Hjartdal er ein fjell- og landbrukskommune med spreidd busetnad – og stor satsing på turisme, hyttebygging, jakt og fiske. Her er mykje skog og fjell og eit sermerkt kulturlandskap; over 200 km2 er med i Brattefjell-Vindeggen landskapsvernområde. Opplevingstilboda spenner frå overnatting og servering i gamle bygningar til bygdetradisjonar innan lokalhistorie, folkemusikk, tradisjonshandverk, utmarkstilbod og friluftsliv. “Fjellvegen over Gaustatoppen” frå Sauland til Rjukan er alternativet for den som vil oppleve Tuddal og Bondal – og kanskje gå turen opp til Gaustatoppen ( 1883 m.o.h.).
